Մայրենի լեզվի օրվան նվիրված առցանց քննարկում

2000 թվականից ի  վեր  Յունեսկօ-ի  որոշմամբ  փետրվարի 21-ը ողջ աշխարհում համարվում է  Մայրենի լեզվի օր՝ կարևորելով  մայրենի լեզվի դերը՝ որպես   յուրաքանչյուր  ազգի  ինքնության վկայություն։ Ամեն տարի  ՀՀ-ում  այս կարևոր տոնը նշվում է տարաբնույթ միջոցառումներով։ ԳԱԱ  լեզվի ինստիտուտն այդ առիթով  նախկինում նախաձեռնում և կազմակերպում էր   հանդիպումներ՝  լեզվի մաքրության ու պահպանության խնդիրներին նախանձախնդիր  մտավորականներին  հուզող  հարցերը  բարձրաձայնելու համատեղ քննարկելու և  լուծումներ փնտրելու  նպատակով։ Համաճարակի չնահանջող վտանգով պայմանավորված՝ այս տարի   Մայրենի  լեզվի միջազգային  օրը նշվեց  ինստիտուտի գիտաշխատողների   և    Գավառի պետական համալսարանի  դասախոսների, ինչպես նաև ուսանողների մասնակցությամբ առցանց քննարկման ձևով՝ հիմնականում անդրադառնալով   վաղուց ի վեր բոլորի դժգոհությունը  հարուցող  դասագրքային  քաղաքականությանը,  մայրենի լեզվի մաքրությանն ու  պատշաճ գործառույթին, զանգվածային լրատվամիջոցների լեզվին   ու լեզվական աղավաղումներին։ Արևմտահայերենի պահպանության  հարցում նախանձախնդիր  հասարակական գործիչ,   Սփյուռքի նախկին նախարար Հրանուշ Հակոբյանն իր խոսքոմ կրկին  անդրադարձավ  գաղթօջախներում և մայր հայրենիքում արևմտահայերենի գործառույթն ապահովելու խնդիրները չանտեսելու և վճռական քայլեր անելու անհրաժեշտությանը։  Հետաքրքիր ու բովանդակալից քննարկումից  գոհ մնացին բոլորը։ Վստահաբար կարելի է ասել,   որ օրվա խորհրդին համահունչ միջոցառում էր։ Շնորհակալությու՛ն կազմակերպիչներին։

Բ.գ.թ., դոցենտ Ջեմմա Բառնասյան