2015 թ. նոյեմբերի 11-ին և 12-ին ՀՀ ԳԱԱ նախագահության նիստերի դահլիճում տեղի ունեցավ ականավոր հայագետ Մանուկ Աբեղյանի ծննդյան 150-ամյակին նվիրված գիտական նստաշրջան, որը կազմակերպվել էր ՀՀ ԳԱԱ Մ.Աբեղյանի անվան գրականության և Հ.Աճառյանի անվան լեզվի ինստիտուտների նախաձեռնությամբ:
Գիտաժողովի աշխատանքներին մասնակցում էին գրականագետներ, լեզվաբաններ, գիտաշխատողներ: Բացման խոսքով հանդես եկավ ՀՀ ԳԱԱ հայագիտության և հասարակական գիտությունների բաժանմունքի ակադեմիկոս քարտուղար ակադեմիկոս Յու.Սուվարյանը, ողջույնի խոսք ասաց ակադեմիկոս Վ.Բարխուդարյանը: Նրանք, արժևորելով մեծ գիտնականի գործը, նշեցին, որ Մ.Աբեղյանը դասական գիտնական է, հայագիտության նորագույն փուլի հիմնադիրը, նրա գիտական ուսումնասիրությունները այսօր էլ արդիական են ու պահանջված:
Լիագումար նիստում ՀՀ ԳԱԱ թղթակից անդամ Ս.Հարությունյանը հանգամանորեն ներկայացրեց Մ.Աբեղյանի գործունեությունը բանագիտության բնագավառում: Զեկուցումներով հանդես եկան ՀՀ ԳԱԱ թղթակից անդամ Ա.Դոլուխանյանը՝ «Մ.Աբեղյանը Կոմիտասի մասին», բ.գ.դ. Վ.Դևրիկյանը՝ «Մ.Աբեղյանը և հայ գրականագիտությունը», բ.գ.թ. Վ.Կատվալյանը՝ «Բարբառի աբեղյանական ըմբռնումը», բ.գ.դ. Ավ.Իսահակյանը՝ «Մ.Աբեղյանը Ավետիք Իսահակյանի գնահատմամբ»:
Գիտաժողովի աշխատանքները շարունակվեցին երկու բաժանմունքներում՝ գրականագիտության և լեզվաբանության, որտեղ զեկուցողները (Մ.Խաչատրյան, Ս.Հովհաննիսյան, Հ.Որսկանյան, Ն.Մկրտչյան, Ա.Ղարիբյան, Ն.Սարգսյան, Ռ.Թոխմախյան, Ջ.Բառնասյան, Հ.Չոլաքյան, Ա.Խաչատրյան, Գ.Մխիթարյան, Մ.Հարությունյան) անդրադարձան Մ.Աբեղյանի գրականագիտական, լեզվաբանական հայացքներին՝ դրանք ներկայացնելով արդի հիմնախնդիրների համատեքստում:
Գիտաժողովը ցույց տվեց, որ Մ.Աբեղյանի գիտական ժառանգությունը դեռ երկար տարիներ անսպառ աղբյուր կլինի հետազոտողների, գիտությամբ զբաղվող մասնագետների համար:
