Գրքի շնորհանդես-քննարկում բարբառագիտության բաժնում

14/02/2019

2019թ. փետրվարի 14-ին ՀՀ ԳԱԱ Հ. Աճառյանի անվան լեզվի ինստիտուտի բարբառագիտության բաժնում տեղի ունեցավ Հ. Թուրշյանի «Բառարան Վանի բարբառի» գրքի շնորհանդեսը: Գիրքը լույս է ընծայել ՀՀ ԳԱԱ «Գիտություն» հրատարակչությունը` «Վասպուրական» հայրենակցական միության ջանքերով: Ծավալվեց գիտական աշխույժ քննարկում, որին մասնակցեցին լեզվի ինստիտուտի բարբառագիտության բաժնի մի շարք աշխատակիցներ: Ինստիտուտի տնօրեն Վ. Կատվալյանը նշեց բարբառագիտական այսօրինակ հրապարակումների կարևորությունը բարբառների պահպանման և ուսումնասիրման առումներով: Բանախոս Հայկանուշ Մեսրոպյանը (բարբառագիտության բաժնի աշխատակից, բ.գ.դ.) մանրամասնորեն ներկայացրեց «Բառարան Վանի բարբառի» գիրքը և դրա ստեղծման նախապատմությունը` նշելով, որ բառարանը հրապարակման պատրաստելիս օգտագործվել են նաև Հ. Աճառյանի անվան լեզվի ինստիտուտում եղած նյութերը:

Բարբառագիտության բաժնի աշխատակից, բ.գ.թ. Արտակ Վարդանյանը նշեց, որ Հ. Թուրշյանի «Բառարան Վանի բարբառի» գիրքը այդ բարբառի բառապաշարը հնարավորինս ամբողջությամբ ընդգրկող առաջին տպագիր բառարանն է, որը պարունակում է շուրջ 6800 բառահոդված: Նա նշեց նաև, որ Վանի բարբառը, լինելով հայերենի բարբառների գանձարանի ամենահարուստ, սակայն անհետացող շերտերից մեկը, դեռևս ունի առավել մանրակրկիտ ուսումնասիրման կարիք:

Շնորհակալական խոսքով հանդես եկավ «Վասպուրական» հայրենակցական միության անդամ Ռուբեն Միրզոյանը: Ելույթներով հանդես եկան նաև բարբառագիտության բաժնի աշխատակիցներ Ժաննա Միքայելյանը և Գայանե Գևորգյանը:

Գ․ Գրիգորյան:

Հայտարարություններ

ԾԱՆՈՒՑՈՒՄ

Ս.թ. հունիսի 12-13-ին կայացած «Ջահուկյանական ընթերցումներ» գիտական նստաշրջանի հարգելի՛ մասնակիցներ, «Ջահուկյանական ընթերցումներ» հանդեսին հոդվածները ներկայացնելու վերջին ժամկետը 2025թ. հուլիսի մեկն է:

Ատենախոսություններ