ԳԱԱ լեզվի ինստիտուտը հյուրընկալել է Ֆրանսիայի INALCO համալսարանի ասպիրանտ Ս․ Չաքմաքչյանին

     Ս.թ. մայիսի 5-ին ՀՀ ԳԱԱ Հ. Աճառյանի անվան լեզվի ինստիտուտում տեղի ունեցավ սեմինար, որը վարում էր INALCO (Արևելյան լեզուների և քաղաքակրթության հիմնարկ) համալսարանի ասպիրանտ Սամուէլ Չաքմաքճեանը (գիտական ղեկավար՝ բ.գ.դ., պրոֆեսոր Անահիտ        Տօնապետեան, հետազոտության անդամ՝ Յովսէփ Տէօվլէթեան), որը համառոտ պատմեց համալսարանի մասին, որտեղ իր ուրույն տեղն ունի  հայագիտությունը:

      Լեզվի ինստիտուտի տնօրինության և արևմտահայերենի բաժնի աջակցությամբ շուրջ մեկ ամիս Ս. Չաքմաքճեանը հետազոտություն է իրականացրել իր ատենախոսության՝ «Հայերէնի խօսքի աւտոմատ ճանաչում – հնչիւնաբանական եւ հնչութաբանական խնդիրներ» շրջանակում: Հետազոտության ընթացքում կատարվել է հայերենի հնչերանգի և շեշտի փորձարկում, ձայնագրվել է 20 մասնակից (10 արևելահայ, 10 սիրիահայ), որոնց տվյալները հետագայում պետք է օգտագործվեն երկտարբերակ համակարգ (արևելահայերեն-արևմտահայերեն) ստեղծելու համար:

         Ինստիտուտի տնօրեն Վ. Կատվալյանը, կարևորելով միջազգային գիտական կապերը, պատրաստակամություն հայտնեց շարունակելու երկու հաստատությունների միջև համագործակցությունը:

         Հանդիպումը անցավ ջերմ մթնոլորտում, ծավալվեց քննարկում, եղան  հետաքրքիր առաջարկներ: