Հուշագիր ԳԱԱ լեզվի ինստիտուտի և Միլանի պետական համալսարանի միջև

       Օրերս ՀՀ ԳԱԱ Հ.Աճառյանի անվան լեզվի ինստիտուտի տնօրեն Վ.Կատվալյանը և Իտալիայի Հանրապետության Միլանի պետական համալսարանի ռեկտոր Էլիո Ֆրանձինը կնքեցին համագործակցության հուշագիր` նպատակ ունենալով երկու հաստատությունների միջև հաստատել և զարգացնել գիտական կապեր, աջակցել կողմերի համար ընդհանուր հետաքրքրություն ներկայացնող հիմնարար գիտական հետազոտությունների անցկացմանը:

         Ըստ Հուշագրի` կողմերը նախատեսում են ընդհանուր լեզվաբանության, լեզվի պատմության, բարբառագիտության, հայերենագիտության և այլ ոլորտներում համատեղ գիտահետազոտական նախագծերի մշակում և իրականացում, հայ-իտալական լեզվամշակութային կապերին առնչվող ծրագրերի, համատեղ գիտական թեմաների, դրամաշնորհային ծրագրերի իրականացում:  Նախատեսվում է նաև հայ-իտալական գիտական և կրթական համատեղ միջոցառումների (սեմինարներ, գիտաժողովներ, քննարկումներ, ամառային դպրոցներ և այլն) կազմակերպում, նաև` տեսակապի միջոցով: Նշվել են նաև գործակցության այլ հնարավորություններ: