Թվայնացման հարցեր. սեմինար կիրառական լեզվաբանության բաժնում

           ՀՀ ԳԱԱ Հ․ Աճառյանի անվան լեզվի ինստիտուտի կիրառական լեզվաբանության բաժնում տեղի ունեցավ էլեկտրոնային պաշտոնական հաղորդակցման յուրահատկություններին և ժամանակակից տեխնոլոգիաներից օգտվելու եղանակներին նվիրված սեմինարների շարքի 3-րդ սեմինարը: Այն նվիրված էր էլեկտրոնային բառարաններից օգտվելու հմտություններին։ Սեմինարի բացումն արվեց կիրառական լեզվաբանության բաժնի վարիչ, բ. գ. թ. Գ. Գրիգորյանի ելույթով: Նա մանրակրկիտ և բազմաբնույթ դիտարկումներ ներկայացրեց բառարանագրության մեջ  թվայնացման վերաբերյալ: Լեզվի ինստիտուտի բառարանագրության բաժնի կրտսեր գիտաշխատող Վ. Բաղրամյանը ներկայացրեց էլեկտրոնային բառարանների ստեղծման նպատակները, սկզբունքները և խնդիրները: Սեմինարի 3-րդ բանախոսի՝ լեզվի ինստիտուտի արևմտահայերենի բաժնի կրտսեր գիտաշխատող Հ. Մարաշլյանի ելույթը «Թվայնացման դարաշրջան. դրականն ու բացասականը» խորագրի շրջանակում էր: Կիրառական լեզվաբանության բաժնի գիտաշխատող, բ. գ. թ. Ս. Հովհաննիսյանը ամփոփեց սեմինարը՝ ներկայացնելով  բառարանների առաջացման և զարգացման պատմությունը հնագույն ժամանակներից մինչև մեր օրեր: Հիմնական ելույթներին հաջորդեց ընդհանուր քննարկումը, որի ընթացքում ներկայացվեց և վերլուծվեց ժամանակակից բարձրագույն տեխնոլոգիաների ընդհանուր ազդեցությունը մարդկային մտածողության, մտավոր աշխատանքի որակի և արագության վրա: Սեմինարին ներկա էին ՀՀ ԳԱԱ լեզվի ինստիտուտի տարբեր բաժինների գիտաշխատողներ, ասպիրանտներ, ինչպես նաև ՀՊՄՀ-ի հենակետային վարժարանի սաները: