Տնտեսագիտության և լեզվի ինստիտուտների համատեղ սեմինարը

        Տեղի ունեցավ ՀՀ ԳԱԱ լեզվի և տնտեսագիտության ինստիտուտների երիտասարդ գիտնականների «Գիտական հարացույցի զարգացումը և վիճակագրությունը հումանիտար ուսումնասիրության մեջ. տվյալների համակարգման գործիքներ և սկզբունքներ» համատեղ հատուկ սեմինարը ԵՊՀ հայ բանասիրության հայոց լեզվի ամբիոնի սաների համար, որոնք իրենց պրակտիկան անցնում էին լեզվի ինստիտուտի կիրառական լեզվաբանության բաժնում։ Սեմինարին մասնակցեցին նաև ՀՀ ԳԱԱ միջազգային գիտակրթական կենտրոնի ուսանողները։ Սեմինարի առաջին մասը՝ գիտական հարացույցի զարգացումը, ընթացավ լեզվի ինստիտուտի կիրառական լեզվաբանության բաժնում (վարող՝ գիտաշխատող Ս. Հովհաննիսյան), իսկ երկրորդ մասը՝ վիճակագրություն և տվյալների մշակում, տնտեսագիտության ինստիտուտի նորաբաց լաբորատորիայում (վարող՝ գիտաշխատող Ա. Ըռքոյան)։

       Ուսանողներին ներկայացվեցին հումանիտար գիտության ուսումնասիրության առարկայի հետազոտության մի շարք կարևոր սկզբունքներ, ինչպես նաև գիտության համընդհանրական մեթոդները: Սեմինարն ամփոփվեց ակտիվ քննարկումով: Երկու ինստիտուտների երիտասարդ գիտնականները պատասխանեցին ուսանողներին հուզող հարցերին՝ փոխանցելով իրենց փորձը: Սեմինարի նպատակն էր ոչ միայն մասնակիցներին ներկայացնել մասնագիտական հմտություններ, այլ նաև ցույց տալ, թե ինչպես են համագործակցում միմյանց զուգահեռ գիտական ոլորտները և ինչպես է մի ոլորտի գործիքը կիրառվում հարակից մյուս ոլորտի աշխատանքի մեջ՝ ընդգծելով այն ճշմարտությունը, որ գիտական ոլորտները խիստ անջրպետված չեն միմյանցից և խրախուսելով տարատեսակ համագործակցությունները: