Տեղի ունեցավ բարբառագիտության բաժնի հերթական նիստը

      Այսօր   ԼԻ բարբառագիտության բաժնում մանրակրկիտ քննարկում և ճշգրտում էինք չափորոշիչները, որոնցով պիտի առաջնորդվեինք տեսակապի միջոցով ՌԴ Կրասնոդարի երկրամասի հայկական դպրոցների աշակերտներին տրված առաջադրանքի կատարման արդյունքները գնահատելիս։ Օտար միջավայրում մայրենի բարբառների պահպանությանը նպաստելու խնդիրը կարևորելով՝ հայերենի ուսուցիչների միջազգային միավորման ՌԴ մասնաճյուղի ղեկավարները դիմել էին ԳԱԱ լեզվի ինստիտուտի բարբառագիտության բաժնի գիտաշխատողներիս՝ խնդրելով մասնագիտորեն գնահատելու օտար միջավայրում իրենց մայրենի բարբառների իմացությամբ առանձնացող հայ դպրոցականներին։ Առաջադրանքի թեման այսպիսին էր. հայերենի տարբեր բարբառներով հարկ էր ներկայացնել Հ. Թումանյանի ՍՈՒՏԱՍԱՆԸ հեքիաթի բեմադրությունը։ Բարբառին հարազատ մնալուց բացի, կարևոր էր համարվելու նաև բեմական համոզիչ խաղը, ազգային կոլորիտ ստեղծելու ունակությունը և այլն։ Առաջնահերթություն վերապահելով բարբառային ճշգրիտ թարգմանությանը՝ հաշվի առանք նաև բեմական արվեստի հմտությունները,անկաշկանդ խոսքը։ Կարծում ենք, որ Հ. Թումանյանի ՍՈՒՏԱՍԱՆԸ հեքիաթն իր հաղթարշավը կշարունակի նաև մերձավոր ու հեռավոր հայկական այլ գաղթօջախներում։ Հայրենիք-Սփյուռք կապերն, անկասկած , ավելի կամրանան նմանատիպ հետաքրքիր նախաձեռնություններով։

 

 Ջեմմա Բառնասյան

ԼԻ բարբառագիտության բաժնի ավագ գիտաշխատող