Նյարդահոգելեզվաբանության լաբորատորիա․ «Հոգեբանական վերնիսաժ» Expo-25

           Սույն թվականի ապրիլի 18-ին ՀՀ ԳԱԱ լեզվի ինստիտուտի կիրառական լեզվաբանության բաժնի  նյարդահոգելեզվաբանության լաբորատորիան մասնակցեց ԵՊՀ-ում կայացած «Հոգեբանական վերնիսաժ» էքսպո-25 գիտագործնական միջոցառմանը։ Հանրապետությունում գործող նյարդահոգելեզվաբանության միակ լաբորատորիան ներկայացրեց հեղինակային «Ենթագիտակցությունից լեզվագիտակցություն և հաղորդակցում. եռափուլ լաբիրինթոս» գիտափորձերի շարքը, որոնցով  բացահատվում են տեղեկատվության ընկալման, այդ տեղեկատվության հիման վրա որոշարկված գիտելիքի ձևավորման, անվանման, լեզվագիտակցության առաջացման և հաղորդակցման գործընթացների մեխանիզմները:

       Լաբորատորիայի ինտերակտիվ ցուցադրությունը բաղկացած էր վեց փուլից։ Յուրաքանչյուր փուլի մասնակցելիս մասնակիցը հոգեբանի և լեզվաբանի մեկնաբանության օգնությամբ բացահայտում էր սեփական ենթագիտակցությունը, լեզվական մտածողությունը և ոչ վերբալ արտահայտչամիջոցների բազմազան կողմերը: Մասնակիցներին ներկայացվեց, թե ինչպես է բարդ մտային միավորը հավաքվում մասնավոր իմաստներից, ինչպես են ենթագիտացություն-գիտակցություն ներքին շերտերը նույնիսկ անհոդաբաշխ հնչյունները վերածում իմաստային համակարգի։ Մասնակիցները ՀՀ ԳԱԱ լեզվի ինստիտուտի նյարդահոգելեզվաբանության լաբորատորիայի կողմից ստացան հուշանվերներ, որոնք խորհրդանշում էին ներկայացված գիտափորձերին նրանց մասնակցությունը։