Միջլաբորատոր նոր համագործակցություն

       Հ. Աճառյանի անվ. լեզվի ինստիտուտի կիրառական լեզվաբանության նյարդահոգելեզվաբանության լաբորատորիան 2026թ. մայիսի 7-ին ընդունեց Ռուսաստանի գիտությունների ակադեմիայի Սանկտ Պետերբուրգի Սեչենովի անվան էվոլյուցիոն ֆիզիոլոգիայի և կենսաքիմիայի ինստիտուտի տարիքային հոգեֆիզիոլոգիայի խմբի ղեկավար, կենսաբանական գիտությունների թեկնածու, առաջատար գիտաշխատող Ելիզավետա Գալպերինային։ Հանդիպման ընթացքում ներկայացվեցին լաբորատորիայի հիմնական հետազոտական ուղղությունները՝ հոգեիմաստաբանություն, իմաստագոյացման գործընթացներ, լեզվամտածողության առանձնահատկություններ, խոսքի ճանաչողական մշակում, ինչպես նաև հեղինակային հոգեթերապևտիկ և նարատիվ մեթոդներ։ Առանձնահատուկ ուշադրություն դարձվեց մշակման փուլում գտնվող հայերեն շարահյուսական նախագիտելիքային միավորների ուսումնասիրության մեթոդիկային և գործիքներին։ Հանդիպման ընթացքում ներկայացվեցին նաև տեղահանված բնակչության խոսքային առանձնահատկությունների և հոգեբանական հարմարվողականության վերաբերյալ իրականացվող հետազոտությունները, օտար լեզվի դասավանդման և հնչող արհեստական բանականության խնդիրները։

     Ջերմ և գիտական մթնոլորտում քննարկվեցին նյարդահոգելեզվաբանության և հոգեֆիզիոլոգիայի արդի մոտեցումները։ Հանդիպման կարևոր արդյունքներից էր առաջիկա համատեղ հետազոտության նախնական հիպոթեզը, որը վերաբերում է դեռահասների և մեծահասակների խոսքի շարահյուսական առանձնահատկություններին: Նախատեսվող հետազոտությունը միավորելու է հոգելեզվաբանական և նեյրոֆիզիոլոգիական մոտեցումները՝ հիմք ստեղծելով հետագա միջլաբորատոր համագործակցության և համատեղ փորձարարական նախագծերի համար։
      Հանդիպումը կարևոր քայլ էր գիտական կապերի ամրապնդման և նոր հետազոտական հեռանկարներ
ձևավորելու ուղղությամբ։