ՀՀ ԳԱԱ Հ. Աճառյանի անվան լեզվի ինստիտուտի գիտաշխատողը Սանկտ Պետերբուրգում

            ՀՀ ԳԱԱ Հ. Աճառյանի անվան լեզվի ինստիտուտի ընդհանուր և համեմատական լեզվաբանության բաժնի ավագ գիտաշխատող բ.գ.թ. Տորք Դալալյանը սեպտեմբերի 25-26-ին և 27-28-ին Սանկտ Պետերբուրգում մասնակցել է   երկու հայագիտական գիտաժողովների:

     Դրանցից առաջինը կազմակերպվել էր անվանի հայագետ Կարեն Յուզբաշյանի (1927-2009) հիշատակին և կոչվում էր «Հայաստանը, Բյուզանդիան և Արևելքը. գրավոր ժառանգությունը՝ ձեռագրերից մինչև համացանց»։ Երկրորդ գիտաժողովը նվիրված էր Ռուսահայոց և  Նոր Նախիջևանի թեմի հիմնադրման 300-ամյակին։

            Գիտաժողովների ընթացքում պարոն Դալալյանը ներկայացրել է  զեկուցումներ, որոնցից առաջինը նվիրված էր հայ վաղմիջնադարյան էպոսի լեզվաբանական և վիպաբանական տարաբնույթ խնդիրների վերհանմանը և  նորովի մեկնաբանմանը, իսկ երկրորդը`  «Էմինյան ազգագրական ժողովածուի» տարբեր հատորներում լույս տեսած բանահյուսական նյութերի ժանրային և լեզվական  քննությանը:

          Պարոն Դալալյանը նշեց, որ թե´ զեկուցումների, թե´ քննարկումների ժամանակ տրվել են հետաքրքրական հարցեր, և ծավալվել են գիտական արգասաբեր բանավեճեր: Գիտաժողովներն անցկացվել են Ռուսաստանի գիտությունների ակադեմիայի Արևելյան ձեռագրերի ինստիտուտում, Ս․ Պ. պետական համալսարանի արևելագիտության ֆակուլտետում և Ազգային հետազոտական համալսարանում։