Հանդիպում երիտասարդ լեզվաբանների հետ

Մայիսի 18-ին ԳԱԱ Հ. Աճառյանի անվան լեզվի ինստիտուտում տեղի ունեցավ տնօրենության հանդիպումն ինստիտուտի շուրջ երեսուն ասպիրանտների ու հայցորդների հետ:  Երիտասարդ հետազոտողները ներկայացրին իրենց թեմաները,   ընթացիկ խնդիրները:

Լեզվի ինստիտուտի տնօրեն Վիկտոր Կատվալյանը կարևորեց երիտասարդ գիտնականների և հետազոտողների կատարած աշխատանքները, հանձնարարեց ակտիվորեն մասնակցել ինստիտուտի գիտական միջոցառումներին:Նա նշեց` միայն ուսումնառության տարիների տքնաջան և հետևողական աշխատանքի շնորհիվ կարելի է հետագայում լուրջ  քայլեր անել լեզվաբանության ու հայերենին վերաբերող  հետազոտություններում:

Վ. Կատվալյանը ընդգծեց, որ խրախուսանքի կարժանան այն ասպիրանտները և հայցորդները, որոնք ակտիվորեն կմասնակցեն  լեզվի ինստիտուտում կազմակերպվելիք գիտական նստաշրջաններին: Պարտադիր համարվեց ընթացիկ տարվա սեպտեմբերի 18-ին լեզվի ինստիտուտում կայանալիք երիտասարդ լեզվաբանների հանրապետական գիտական հերթական նստաշրջանին ասպիրանտների և հայցորդների մասնակցությունը:  

Ինստիտուտի տնօրենը տեղեկացրեց նաև, որ առաջիկայում երիտասարդ լեզվաբանների համար նախատեսվում են մի շարք  դասընթացներ՝ նվիրված հայերենի ծագմանը, գրաբարին, համեմատական քերականությանը, հայոց լեզվի պատմությանը, միջին հայերենին, բարբառագիտությանը:  

Ինստիտուտի ասպիրանտ Անի Վարդանյանը և աշխատակից Ամալյա Պողոսյանը պատրաստակամություն հայտնեցին երիտասարդ լեզվաբանների և աշխատակիցների համար կազմակերպել անգլերենի անվճար դասընթացներ  :