Գործարկվել է grigortatevatsi.am կայքը

       Գրիգոր Տաթևացու հարուստ գրական ժառանգությունը թույլ է տվել նրա մասին խոսելու իբրև նշանավոր փիլիսոփայի, մանկավարժի, «գրչութեան արուեստի» տեսաբանի, միջնադարյան տնտեսագետի, եկեղեցական գործչի և րաբունապետի, իսկ 2002 թվականից հրատարակված  մի շարք աշխատություններ և հատկապես նրա նշանավոր «Գիրք հարցմանց»-ի  աշխարհաբար թարգմանությունը թույլ են տալիսանվերապահորեն  սրանց ավելացնել միջնադարյան քերականին, առակախոսին, բժշկագետին, մատենագետին, բազմաթիվ նոր բառերի հեղինակին, հանրագիտակ գիտնականին ու Հայոց եկեղեցու մեծ նվիրյալին:

       Այդ աշխատություններից յուրաքանչյուրը Գրիգոր Տաթևացու գրական ժառանգության այս կամ այն ոլորտի համապարփակ ուսումնասիրություն է, որոնց համադրումով ամբողջանում են Հայոց միջնադարի մեծագույն մտածողի հայացքները:

       Ստորև Ձեզ ենք ներկայացնում ՀՀ ԳԱԱ լեզվի ինստիտուտի Հայոց լեզվի պատմության բաժնի ավագ գիտաշխատակից բ.գ,թ. Սուսաննա Գրիգորյանի աշխատասիրած grigortatevatsi.am կայքը, որտեղ զետեղված են Գրիգոր Տաթևացու «Գիրք հարցմանց»-ի  բնագիր օրինակը, աշխարհաբար թարգմանությունը, ինչպես նաև՝ 2002 թվականից հրատարակված  մի շարք աշխատություններ: