Գիտական աշխատանքի կազմակերպումը թվային տեխնոլոգիաների միջոցով

        ՀՀ ԳԱԱ Հ․ Աճառյանի անվան լեզվի ինստիտուտի կիրառական լեզվաբանության բաժնում տեղի ունեցավ ՀՀ ԳԱԱ գիտությունների ազգային ակադեմիայի հիմնադրման 80-ամյակի առթիվ նախատեսված սեմինարներից վերջինը: Այն նվիրված էր էլեկտրոնային որոնման համակարգերում մասնագիտական գրականություն փնտրելու սկզբունքներին և էլեկտրոնային ձևաթղթերում մեծ ծավալի տվյալների ավտոմատ մշակմանը։ Սեմինարի բանախոսներն էին  ՀՀ ԳԱԱ լեզվի ինստիտուտի կիրառական լեզվաբանության բաժնի վարիչ Գայանե Գրիգորյանը և նույն բաժնի գիտաշխատող Սիրանուշ Հովհաննիսյանը:

        Գ. Գրիգորյանը խոսեց վիճակագրական լեզվաբանության գլխավոր սկզբունքների և հետազոտության արդյունքում ձևավորված տվյալների մշակման հիմունքների մասին: Ս. Հովհաննիսյանը ներկայացրեց գիտական գրականության որոնման և զտման աշխատանքի հմտությունները էլեկտրոնային շտեմարաններում և որոնման հիմնական համակարգերում: Սեմինարն ավարտվեց կիրառական բնույթի հավելյալ հարցերի քննարկումով: