Հայերենի դասավանդման վիճակը Մերձավոր Արևելքի հայկական համայնքներում

ՀՀ ԳԱԱ Հ. Աճառյանի անվան լեզվի ինստիտուտում փետրվարի 26-ին տեղի ունեցած գիտական սեմինարի թեման Մերձավոր Արևելքի երկրներում հայերենի դասավանդման վիճակն էր: Օրվա բանախոսը՝ լեզվի ինստիտուտի արևմտահայերենի բաժնի ավագ գիտաշխատող  Հակոբ Չոլաքյանը, ընդգծելով Մերձավոր Արևելքում հայկական դպրոցների ազգապահպան հսկայական նշանակությունը, հանգամանորեն ներկայացրեց դրանց ստեղծման հանգամանքներն ու գործունեության պայմանները, շրջանի տարբեր երկրներում  հայ դպրոցի կրած կազմակերպական ու բովանդակային փոփոխությունների փուլերը, արևմտահայերենի պահպանման ու զարգացման գործում անուրանալի դեր ունեցող կրթական այդ հաստատությունների առջև ժամանակի ընթացքում ծառացած մարտահրավերները: Հ.Չոլաքյանը համակողմանիորեն անդրադարձավ տարածաշրջանի հայկական համայնքներում հայոց լեզվի դասավանդման հարցերին,  տարածաշրջանում հայերենի վիճակին, համայնքների և կրթական հաստատությունների առջև ներկայումս ծառացած խնդիրներին: Ընդգծվեց, որ Մերձավոր Արևելքի հայկական համայնքները մեծ դեր են խաղացել նաև ԱՄՆ-ում, Կանադայում, Ավստրալիայում ու այլ երկրներում հայ դպրոցի հիմնադրման և զարգացման գործում: Նշվեց, որ հատկապես Լիբանանի և Սիրիայի հայ համայնքները՝ իրենց կրթական հաստատություններով, նաև Եգիպտոսի, Հորդանանի, Կիպրոսի, Քուվեյթի հայկական դպրոցները շարունակում են մնալ արևմտահայերենի ուսուցման և պահպանման ամենակարևոր կենտրոնները:

Այնուհետև ներկաները, որոնց թվում էին նաև ՀՀ սփյուռքի նախարարության ներկայացուցիչներ, դիտարկումների ու հարցուպատասխանի միջոցով ամբողջացրին թեմայի  քննարկումը: