ՀՀ ԳԱԱ լեզվի ինստիտուտում պաշտոնապես բացվեց փորձառական հնչյունաբանության լաբորատորիան

         2023թ․ մարտի 27-ին Հայաստանի Հանրապետության գիտությունների ազգային ակադեմիայի լեզվի ինստիտուտի կիրառական լեզվաբանության բաժնում ավելի քան 30 տարի անց վերաբացվեց հանրապետությունում միակ փորձառական հնչյունաբանության լաբորատորիան։ Բացման արարողությանը ներկա էին գիտությունների ազգային ակադեմիայի, հանրապետության բուհերի,  գիտակրթական կենտրոնների ներկայացուցիչներ, ուսանողներ, հյուրեր։ Այն բացվեց ՀՀ ԳԱԱ ֆինանսավորմամբ, լեզվի ինստիտուտի տնօրեն Վիկտոր Կատվալյանի աջակցությամբ ու սատարումով և կիրառական լեզվաբանության բաժնի վարիչ Գայանե Գրիգորյանի ջանքերով։ Լաբորատորիան անվանակոչվեց բանասիրական գիտությունների դոկտոր, վաստակաշատ գիտնական և ականավոր հնչյունաբան Ամալյա Հարությունի Խաչատրյանի անունով։  

        Լաբորատորիան կարևոր նշանակություն կունենա ոչ միայն լեզվի ինստիտուտի, այլ նաև հանրապետության բոլոր գիտակրթական հաստատությունների համար։ Այն  կծառայի նաև ինստիտուտի այլ բաժիններին՝ արևմտահայերենի, ժամանակակից հայոց լեզվի և այլն, իրականացնելու հնչյունական համակարգերի փորձառական զուգադրական  ուսումնասիրություններ, որոնք կբերեն հետաքրքիր եզրահանգումների և հայտնագործությունների: Հնչյունաբանական լաբորատորիայի հնավորությունները թույլ կտան համահունչ քայլելու փորձառական հնչյունաբանության արտասահմանյան նորագույն նվաճումների հետ։ 

         Լաբորատորիայի հիմնական նպատակը  լեզվի բոլոր դրսևորումների հնչյունաբանական հետազոտություններ կատարելն է։ Օրինակ, լաբորատորիան հնարավորություն կտա ոչ միայն գրական արևելահայերենի հնչյունական համակարգի փորձառական հետազոտություններ կատարել, այլ նաև օգտակար կլինի հայերենի բարբառների հնչյունական իրողությունները, ինչպես նաև արևմտահայերենի հնչյունական համակարգն ուսումնասիրելիս։ Լաբորատորիայի դռները բաց են բոլոր այն անձանց և գիտական հաստատությունների առջև, որոնք հետաքրքրված են այս բնագավառով, և լաբորատորայի աշխատակիցները պատրաստ են գործակցելու նրանց հետ։