ՀՀ գիտությունների ազգային ակադեմիայի Հրաչյա Աճառյանի անվան լեզվի ինստիտուտի տնօրեն Վիկտոր Կատվալյանը տարօրինակ ու զարմանալի է համարում նախկին վարչապետ Հրանտ Բագրատյանի դիտարկումները ` կապված հայոց լեզվի հետ:
«Ինձ թվում էր, թե ինքը պիտի որ, այնուամենայնիվ, բավականաչափ տեղյակ լինի լեզվական հարցերին: Չեմ հասկանում` ինչպես կարող է այդ մակարդակի տնտեսագետն այդ կարգի դիտարկումներ անել, որովհետեւ ես գիտեմ շատ լավ տնտեսագետների, որոնք այնքան լավ են պատկերացնում լեզվական հարցերը: Մի տեսակ չար կատակ ոնց որ լինի: Անհավատալի, տարօրինակ բաներ է ասում: Չեմ հավատում, որ նա այդպես է մտածում: Այնքան անհեթեթ են ասածները, որ մասնագիտորեն անդրադառնալու հարկ չկա: Չես հասկանում` այս մարդը կատա՞կ է անում, ինչ-որ նպատակնե՞ր ունի, դրանով ուրի՞շ բան է ուզում ասել: Համենայնդեպս, հասարակության մեջ կան մարդիկ, որոնք ծայրահեղության են գնում` չիմացությունից ելնելով: Իր պարագայում դժվար թե այդքան չիմացություն լիներ: Չեմ հասկանում»,- armtimes.com-ին ասաց Վիկտոր Կատվալյանը:
Այդուհանդերձ, նա նկատեց, որ նախկին վարչապետի դատողությունները լեզվի մասին վկայում են, որ կա որոշակի աշխատանքի անհրաժեշտություն:
«Մյուս կողմից էլ` չկա չարիք առանց բարիքի: Դա նշանակում է, որ մեր հասարակության մեջ լեզվական պատկերացումները ճշգրտելու անհրաժեշտություն կա: Եվ այս իմաստով շատ լավ կլիներ, եթե մեր հեռուստատեսությունները լեզվին նվիրված հաղորդումներ կազմակերպեին, ու հնարավոր լիներ հասարակության, նույնիսկ մտավորականության մեջ ճիշտ պատկերացումներ ձեւավորել լեզվի մասին: Դրա անհրաժեշտությունը ոնց որ թե ցայտուն դարձավ Բագրատյանի ելույթից հետո»,- կարծիք հայտնեց ԳԱԱ լեզվի ինստիտուտի տնօրենը:
Ինչ վերաբերում է հայերենը` արմեներեն, իսկ Հայաստանը` Արմենիա կոչելու Բագրատյանի նախընտրությանը, լեզվաբանը պատասխանեց. «Ասածներից ամեն ինչը անհեթեթ է, չի կարելի դրան լրջորեն վերաբերվել եւ դրանց անդրադառնալ, քննարկել: Ոչ մի ճիշտ, նորմալ բան նա չի ասում: Ես դրա համար եմ զարմանում, որ այդ մակարդակի մտավորականն այդպիսի մտքեր է հայտնում»:
Բագրատյանը հայոց լեզվի աղքատիկության եւ Հայաստանն անվանափոխելու մասին գրել էր ֆեյսբուքյան իր էջում: Նրա արտահայտած կարծիքներն արդեն մի քանի օր է` թեժ կրքեր են բորբոքել: Շատերը ստանձնել են հայերենի պաշտպանության գործը, որոշների համար էլ ընդունելի են նախկին վարչապետի պնդումները:
Աղբյուրը՝ http://armtimes.com/hy/article/118691
Անուշ Անդրանիկի Խաչատրյան «Էլեկտրոնային մամուլի լեզուն (բառային կազմ, քերականական համակարգ)»
(թեկնածուական ատենախոսություն) Ժ.02.01 «Հայոց լեզու»
30.04.2024, ժ.15-ին
...
Վալտեր Տիգրանի Բերբերյան «Հայ ոճագիտական մտքի զարգացման հիմնախնդիրները (1950-2020-ական թթ.)»
(թեկնածուական ատենախոսություն) Ժ.02.01 «Հայոց լեզու»
26.01.2024, ժ.15-ին
...
