Ս. թ. մարտի 26-ին Հ. Աճառյանի անվան լեզվի ինստիտուտի կիրառական լեզվաբանության բաժնում անդրադարձ կատարվեց թվականների գործածության սխալներին: Բանախոս Գայանե Գրիգորյանը նշեց, որ թվականները առաջին հայացքից արտաբերական դժվարություններ չունեն, սակայն պարզվում է, որ խոսողները ամենից շատ սխալներ անում են հենց այս խոսքի մասին վերաբերող բառերի արտաբերության ժամանակ: Գրության պարագայում խնդիրներ քիչ են առաջանում, որովհետև թվականներն արտահայտվում են հիմնականում թվանշաններով:
Բանախոսը նշեց, որ թերևս բացարձակ թվականներից միավորների արտաբերության ժամանակ են արվում ամենից շատ սխալները, ինչպես՝ էրկու (երկու), իրեք (երեք), հինգը (հինգ), յոթը (յոթ), ութը (ութ), իննը (ինը): Հաճախ համադրական բարդություններում տասն թվականին հաջորդող և ձայնավորով սկսվող երկրորդ բաղադրիչից առաջ արտասանում են ը, օրինակ` տասնըյէրեք, տասնըութ: Շատ տարածված է առաջին դասական թվականի առաջի սխալ ձևի կիրառումը:
Խոսելով երկնիշ թվականների մասին` Գ. Գրիգորյանը նշեց, որ խոսակցական լեզվում քսան թվականը երբեմն արտաբերում են ընդգծված ը-ով`քըսան, երեսուն-ը` եռեսուն: Հիսուն թվականի արտաբերությունը ևս աղավաղում են` հնչեցնելով հիցուն.. նույն կերպ` վաթսուն-ը` վացուն, ութսուն-ը` ուցուն: Տասնավորներից շատ տարածված է ութսուն-ի ութանասուն կիրառումը` յոթանասուն-ի նմանությամբ: Հարյուրավորների դեպքում աղավաղվում է հարյուր-ը՝ հայրուր կամ հարուր արտասանությամբ: Միլիոն բառն արտաբերում են երկարացված լ-ով:
Ծավալվեց քննարկում, աշխատակիցները բերեցին թվականների սխալ գործածության իրենց օրինակները:
