Բարբառագիտության բաժնի հերթական նիստը

            ՀՀ ԳԱԱ Հ․ Աճառյանի անվան լեզվի ինստիտուտի բարբառագիտության բաժնի հերթական նիստում զեկուցումով հանդես եկավ բաժնի գիտաշխատող Մհեր Քումունցը։ Բանախոսը վերջերս բաժնի հետազոտական ծրագրով եղել է Մեղրիի տարածաշրջանի գրեթե բոլոր բնակավայրերում՝ Նռնաձոր, Շվանիձոր, Ալվանք, Արաքսավան, Ագարակ, Կարճևան, Լեհվազ, Կուրիս, Գուդեմնիս, Վահրավար, Լիճք, Տաշտուն և այլն, հետազոտել տարածաշրջանի բարբառային միավորների ընդհանուր պատկերը՝ հետագայում դրանց շուրջ ուսումնասիրություններ կատարելու նպատակով։ Արձանագրվեց, որ Մեղրիի տարածաշրջանի բարբառների (Կարճևանի, Կաքավաբերդի), խոսվածքների (Մեղրիի, Ագարակի, Շվանիձորի, Լիճքի, Տաշտունի և այլն)  ուսումնասիրությունը կամ նորովի մեկնաբանումը կարևոր է ոչ նյութական մշակութային ժառանգության արժևորման տեսանկյունով, նաև հայագիտության տարբեր բնագավառների համար։ Բաժնի աշխատակիցը առաջարկներ ներկայացրեց բարբառային հիշյալ միավորների հետազոտության մեթոդաբանության վերաբերյալ։ Գիտարշավի ընթացքում Մ․ Քումունցը հանդիպել է տեղացիների, որոնք ցանկություն են հայտնել համագործակցելու բարբառագիտության բաժնի մասնագետների հետ։ ՀՀ ԳԱԱ բարբառագիտության բաժնի նիստում որոշվեց ծավալել Մեղրիի տարածաշրջանի բարբառային միավորների հատկանիշների գրանցման աշխատանքներ՝ Հայերենի բարբառագիտական ատլասի նյութերի հավաքման ծրագրով: Առաջարկվեց նաև հետազոտության արդյուքները ներկայացնել գիտական հրապարակումներում և Մեղրիի տարածաշրջանի բարբառային միավորներին, ազգագրական, պատմական հարցերին նվիրված գիտաժողովում