Կյանքից հեռացել է ՀՀ ԳԱԱ լեզվի ինստիտուտի երկարամյա աշխատակից, բանասիրական գիտությունների դոկտոր Ռիմա Նիկոլայի Շալունցը:
Ռ.Շալունցը ծնվել է Գորիսում 1937 թ. հոկտեմբերի 9-ին: 1944 թվականին ընդունվել է Գորիսի թիվ 2 միջնակարգ դպրոցը: Ավարտելուց հետո որոշ ժամանակ աշխատել է Գորիսի պետական թատրոնում: 1961 - 1965 թթ. սովորել է Երևանի Խ.Աբովյանի անվան պետական մանկավարժական ինաստիտուտի բանասիրական ֆակուլտետում, ապա ընդունվել ՀՀ ԳԱԱ լեզվի ինստիտուտի ասպիրանտուրան՝ «Բառագիտություն և բառարանագրություն» մասնագիտությամբ: 1972 թ. պաշտպանել է թեկնածուական՝ «Համանուն բառերը ժամանակակից հայերենում», 1994 թ. դոկտորական ատենախոսություն «Զանգվածային լրատվության լեզուն և ոճը» թեմաներով: Վերջինս որպես ուսումնական ձեռնարկ գործածվում է բուհերում:
Ռ.Շալունցը զբաղվում էր բառագիտությամբ: Հետաքրքիր են նրա դիտարկումները համանունների, հականիշների, տերմինային համանիշության և բազմիմաստության վերաբերյալ: Ռիմա Շալունցը հեղինակել է «Արդի հայերենի համանունների դպրոցական բառարանը» (1980 թ.), որում ընդգրկված են ինչպես դպրոցական դասագրքերում, այնպես էլ հայ դասական և խորհրդային գրողների երկերում (19-րդ դ. 70-ական թվականներից սկսած) հանդիպող համանուն բառերը:
Նա բազմիցս հանդես է եկել մամուլում հանդիպող սխալների, դրանց վերացման, հայերենի անաղարտության վերաբերյալ հոդվածներով, որոնք սիրով և շնորհակալությամբ են ընդունվել ընթերցողների կողմից:
Մասնակցել է «Մեր լեզուն, մեր խոսքը» հեռուստատեսային հաղորդաշարին՝ անդրադառնալով հայերենին անհարազատ ոճերին, հոլովական սխալ կիրառություններին, կապակցելիության սխալներին և այլն:
2000 թվականից բնակվում էր ԱՄՆ-ում:
Ռ. Շալունցը մահացել է 2021թ. հունվարի 22 -ին: Նրան ճանաչողները միշտ կհիշեն նրան՝ զուսպ, համեստ, աշխատասեր, իր գործին նվիրված մարդուն:
ՀՀ ԳԱԱ լեզվի ինստիտուտի ավագ գիտաշխատակից Սիլվա Պապիկյան