«ԷԼԵԿՏՐՈՆԱՅԻՆ ՍՐԲԱԳՐԻՉԻ ՏՎՅԱԼՆԵՐԻ ՇՏԵՄԱՐԱՆԻ ԲԱՌԱՊԱՇԱՐԻ ՁԵՎԱՅԻՆ ՆԿԱՐԱԳՐՈՒԹՅԱՆ ՄԱՍԻՆ» ԹԵՄԱՅՈՎ ՍԵՄԻՆԱՐ

        Ս.թ. հունիսի 7-ին ՀՀ ԳԱԱ Հ. Աճառյանի անվան լեզվի ինստիտուտի հեռավար հարթակում տեղի ունեցավ ընդհանուր և համեմատական լեզվաբանության բաժնի հերթական սեմինարը, որը վարում էր բաժնի ավագ գիտաշխատող, բ.գ.թ., դոցենտ Մերի Սարգսյանը: Սեմինարի թեման նվիրված էր կիրառական լեզվաբանության արդի խնդիրներից մեկին՝ հայերեն էլեկտրոնային սրբագրման համակարգին և դրանց կազմության սկզբունքներին:

         Բանախոսը ներկայացրեց հայալեզու տեքստերի էլեկտրոնային նոր սրբագրիչի տվյալների շտեմարանի բառապաշարի ձևային նկարագրության խնդիրները: Նշեց, որ «Հայերեն էլեկտրոնային սրբագրման համակարգ» գիտահետազոտական թեմայի շրջանակներում իր ղեկավարած աշխատանքային խումբը ստեղծել է սրբագրման մի համակարգ, որի միջոցով փորձ է արվում ամբողջական և լիարժեք կերպով սրբագրել արդի արևելահայերենով գրված ցանկացած տեքստ, ինչպես նաև օգտագործելով վեբ տեխնոլոգիաների բոլորհնարավորությունները, հայերեն էլեկտրոնային սրբագրման համակարգը հասանելի դարձնել հանրության լայն շրջանակներին` ապահովելով համակարգից հեշտությամբ օգտվելու հնարավորություն:

          Էլեկտրոնային նոր սրբագրիչը կնպաստի ինչպես լեզվաբանական հետազոտությունների բնագավառում համակարգչային տեխնիկայի կիրառությանը, համակարգչային ծրագրերի միջոցով տեքստերում եղած լեզվական սխալներիվերացմանը, այնպես էլ լայն առումով հայերենի` որպես համացանցային լեզվի հաջող գործառությանը: