Գիտական քննարկում հայոց լեզվի պատմությա բաժնում

        Ս.թ. մարտի 15-ին ՀՀ ԳԱԱ հայոց լեզվի պատմության բաժնում քննարկվեց  Պողոս եպիսկոպոս Ադրիանապոլսեցու «Հինգ դարերի զանազանությունը» գրքի՝ 1902 թվականի արևմտահայերեն հրատարակության արևելահայերեն թարգմանությունը: Նշվեց, որ գիրքը վերջերս հրատարակվել է Զորավոր Սուրբ Աստվածածին եկեղեցու հովանավորությամբ:

        Բանախոսի կարծիքով գրքի ձևը և հարցերի պատասխաններն ամբողջությամբ ծաղկաքաղվել են Գրիգոր Տաթևացու «Գիրք հարցմանց»-ից՝ «Գիրք հարցմանց»-ի՝ այդ դարերի վերաբերյալ 180 հարցերը համառոտելով 26 հարցերի մեջ: Ըստ նրա՝ գիրքն առաջին անգամ հրատարակվել է 1864 թվականին՝ թուրքերեն: Ինչպես հայտնի է, «Գիրք հարցմանց»-ի միակ հրատարակությունը եղել է 1729 թվականին Կոստանդնուպոլսում, և այդ հրատարակության ժամանակ գրքից արդեն իսկ դուրս է մնացել իսլամի դեմ ուղղված «Ընդդեմ տաճկաց» գլուխը. հասկանալի է, որ Թուրքիայում նմանատիպ հրատարակությունը պետք է արգելվեր:

         Վերջում բանախոսը նշեց, որ ըստ էության՝ Պողոս եպիսկոպոս Ադրիանապոլսեցին, զգուշացել է թուրքերի համար ոչ ցանկալի հեղնակին անդրադառնալուց, (քանի որ գիրքը ծայրից ծայր Աստվածաշնչի մեկնությունն է և բոլոր հակառակորդ տեսությունների ջախջախումը, այդ թվում նաև՝ իսլամի), բավականին հմտորեն համառոտել է «Գիրք հարցմանց»-ի իրեն հետաքրքրող հատվածը՝ հավելելով ընթերցողին ուղղված քարոզ-ուղերձներ: